Esta actuación forma parte do Plan de Actuación Integrado 'Carballo a man', un ambicioso programa de transformación urbana cofinanciado pola Unión Europea que supón un investimento total de 10.912.878 euros. A rehabilitación da casa do concello, construída en 1973, busca solucionar a súa obsoleta eficiencia enerxética.
O contrato licitado ten como finalidade definir as solucións técnicas necesarias para converter o edificio nun de consumo case nulo. Isto implicará unha redución do gasto de enerxía primaria non renovable nun 49,82%, pasando de 136,29 a 68,39 kWh/m² ano.
Entre as principais liñas de actuación que deberá contemplar o proxecto atópanse a mellora da envolvente con fachada transventilada e substitución das carpintarías por sistemas de altas prestacións. Tamén se prevé a creación dunha cuberta ecolóxica con sistemas de recollida e reutilización de augas pluviais, a integración de paneis fotovoltaicos para autoconsumo e a renovación integral da iluminación con tecnoloxía LED de alta eficiencia.
Ademais das melloras enerxéticas, o proxecto abordará a eliminación de barreiras arquitectónicas e a optimización da sinalización para garantir a accesibilidade universal. Dada a importancia estratéxica do edificio, que alberga a case 120 persoas que desenvolven alí o seu traballo diario, o deseño final será consultado co persoal municipal para acadar unha solución consensuada.
“"Con esta licitación, Carballo non só moderniza a súa sede administrativa, senón que cumpre cos seus obxectivos de sustentabilidade, adaptación ao cambio climático e fortalecemento da gobernanza local."
