A Consellería do Medio Rural, por segundo ano consecutivo, convoca estas axudas coa finalidade de apoiar aos produtores que aposta pola preservación do patrimonio xenético e pola sustentabilidade do rural. Da contía total, destínanse 350.000 euros para explotacións bovinas e os 40.000 restantes para ovino e caprino.
Durante unha visita á gandería de Marcos Antonio Ríal Costa en Ponteceso, especializada en vacas cachenas, Belén do Campo destacou a utilidade da gandería en extensivo para a limpeza de franxas secundarias. Esta explotación, que conta con 60 vacas, xa recibiu apoio da Xunta o ano pasado para o mantemento de exemplares de recría.
O obxectivo destas axudas é que os gandeiros poidan substituír os seus animais por exemplares criados na propia explotación desde o desleite, mellorando a adaptación ao medio, reducindo custos e garantindo a continuidade das explotacións.
O prazo para solicitar estas subvencións, que se abriu o pasado 7 de xullo, permanecerá aberto ata o 8 de agosto. As axudas poderán chegar a un importe máximo por granxa de 15.000 euros, cunha achega tope por animal de 350 euros para bovinos e 60 para ovino e cabrún. Poderán beneficiarse tanto persoas físicas como xurídicas con explotacións inscritas no libro xenealóxico das razas autóctonas de Galicia.
O ano pasado, 207 explotacións galegas beneficiáronse destas axudas, cun investimento de case 370.000 euros. Na provincia da Coruña, concedéronse 38 axudas (26 para bovino e 12 para ovino/cabrún), cun investimento superior a 60.000 euros. Na comarca de Bergantiños-Costa da Morte, tres granxas recibiron en total 7.000 euros.
Ademais, Belén do Campo lembrou a convocatoria, por primeira vez, dos premios á excelencia gandeira, en colaboración coa Federación de Razas Autóctonas de Galicia (Boaga), para recoñecer o traballo dos criadores de razas bovinas autóctonas ameazadas, valorando a súa relevancia social, medioambiental e cultural.
Estes galardóns buscan distinguir a actividade dos gandeiros no mantemento destes recursos zooxenéticos, promovendo produtos cárnicos de maior calidade de forma sustentable e velando polo benestar animal. Estrutúranse en cinco categorías, unha por cada raza ameazada, con premios á Excelencia Gandeira, ao Legado e Vigor, e á Identidade e Semente da Raza.
