As parroquias de Lema e Noicela acolleron esta fin de semana diversas actividades formativas centradas na divulgación científica. A iniciativa, integrada no Proxecto Talento km0 (TALK0), busca democratizar o coñecemento e fomentar as vocacións científicas entre a cidadanía local.
No centro social de Lema, os asistentes exploraron a paleoecoloxía mediante o uso de microscopios para analizar rexistros de pole fósil. Esta sesión permitiu comprender como os cambios ambientais do pasado inflúen na evolución actual dos ecosistemas.
Pola súa banda, o centro social de Imende, en Noicela, foi o escenario dun obradoiro de cristalografía. Os participantes aprenderon procesos físico-químicos para crear as súas propias estruturas xeolóxicas, que deberán completar o seu crecemento nos próximos días.
A actividade contou coa participación de 37 persoas de idades comprendidas entre os oito e os setenta anos. O proxecto, que conta con financiamento da Unión Europea, ten como obxectivo poñer en valor os recursos locais e o coñecemento compartido como base para a protección do patrimonio natural.
