A delegada da Xunta na Coruña, Belén do Campo, xunto ao alcalde de Cabana de Bergantiños, José Muíño, e a directora territorial da Consellería de Medio Ambiente e Cambio Climático, Pilar Arias, visitaron este luns o paseo marítimo á altura da Escola de Vela. A actuación, que contou cunha axuda de 15.000 euros da Consellería de Medio Ambiente e Cambio Climático, centrouse na recuperación dun tramo de paseo marítimo e miradoiro con vistas á desembocadura do río Anllóns, nunha contorna de especial interese paisaxístico integrada na Rede Natura.
Os traballos permitiron corrixir o deterioro do pavimento, mellorar as condicións de seguridade para os peóns e incorporar elementos informativos que facilitan a orientación dos usuarios e a interpretación dos valores naturais da zona. Incluíron a reparación dun tramo de 25 metros de lonxitude e cinco metros de ancho, nivelando a superficie, estendendo unha capa de formigón e repoñendo o pavimento e os bordos, reutilizando materiais e incorporando nova pedra para manter a estética.
Nas marxes da senda, regularizáronse os terreos de terra con terra vexetal e sementáronse con céspede para estabilizar o solo e reducir o risco de erosións, mantendo a configuración e os materiais orixinais.
O proxecto tamén incluíu a instalación de novos elementos de sinalización. Colocáronse dous sinais direccionais de madeira tratada que indican as distancias ata os extremos do itinerario (1.260 metros ata As Grelas e 3.270 ata o monte de San Sebastián) e unha mesa interpretativa no miradoiro con información sobre a paisaxe e a desembocadura do río Anllóns. Estes elementos están elaborados con materiais resistentes ás condicións ambientais.
Belén do Campo lembrou que esta actuación forma parte das axudas da Consellería de Medio Ambiente destinadas á preservación do patrimonio natural e cultural nos espazos protexidos. Destacou que a Xunta concedeu este ano máis de 1,8 millóns de euros a través desta convocatoria, apoiando 159 proxectos en Galicia. Na provincia da Coruña concedéronse 28 axudas por case 400.000 euros, e na comarca de Bergantiños-Costa da Morte, 5 concellos recibiron preto de 70.000 euros.
