O programa A Laracha Conecta comezou as súas visitas a explotacións agrícolas, gandeiras e empresas do municipio co obxectivo de achegar o alumnado á realidade dos sectores produtivos locais e ás oportunidades profesionais que estes ofrecen.
A primeira actividade tivo lugar o luns en Horta Ramisquido, onde alumnos de sexto de Primaria do CEIP Otero Pedrayo coñeceron o traballo desta explotación na parroquia de Coiro. O martes, estudantes do Grao Básico de Formación Profesional (FP) de Cociña e Restauración de Carballo visitaron a Panadería Suso para coñecer os seus procesos.
Este xoves, o alumnado do CEIP de Caión visitará a Gandería Montemaior para coñecer o funcionamento dunha explotación gandeira e o traballo diario que require.
Durante as visitas, os profesionais responsables das explotacións e empresas, xunto con persoal educativo, explican os procesos de traballo, as competencias necesarias e as posibilidades de desenvolvemento profesional en ámbitos clave para a economía local.
A próxima semana, A Laracha Conecta centrarase no sector industrial e nos oficios. O luns 26, alumnos do Grao Básico de FP de Peiteado e Estética visitarán a Peluquería J. Vázquez. As visitas ás instalacións de Unifersa, no parque empresarial, realizaranse os días 26, 28 e 30 de outubro, con alumnado de ESO do IES Agra de Leborís e do Grao Superior de FP de Transporte e Loxística.
O sector primario tamén terá continuidade coas visitas a Hortalizas Añón Pardiñas, en Erboedo, os días 27 e 29 de outubro.
Estas accións forman parte dos tres eixos de A Laracha Conecta: sector primario, industria e oficios, e turismo e deporte. O programa busca favorecer o coñecemento mutuo entre empresas e estudantes, contribuír á orientación académica e laboral da mocidade e dar visibilidade á diversidade de actividades económicas do municipio.
O programa completarase en novembro con tres encontros abertos ao público. A iniciativa realízase en colaboración coa Deputación da Coruña.
