A proposta de acoller un concerto da Unidade de Música do Cuartel Xeral do Mando de Apoio á Manobra (MAM) no Teatro Cine Elma, como parte dos actos do Día das Forzas Armadas, presentouse nun acto presidido polo alcalde, José Carlos Vidal, e a concelleira Patricia Lojo.

O BNG, socio de goberno, manifestou o seu descontento a través dun comunicado, asegurando que as súas concelleiras "non tiñan coñecemento da iniciativa impulsada pola Alcaldía". Os nacionalistas rexeitan "contundentemente" a actuación, "nun momento no que os conflitos armados se estenden por todo o planeta e no que millóns de persoas padecen as súas graves consecuencias".

O partido argumenta que "segue a acreditar nun mundo que se substente na paz, no respecto mutuo, na soberanía dos pobos e na solución dos conflitos pola vía diplomática" e critica "o brutal incremento destinado a gasto militar por parte dos Gobernos da UE, nomeadamente do Estado español, mentres a cidadanía sofre os intensos e continuos recortes en sanidade, ensino, vivenda ou política social".

En liña coas súas declaracións, o BNG fai "un chamamento a toda a veciñanza da Pobra do Caramiñal a participar na manifestación que vai ter lugar o vindeiro sábado, 30 de maio, ás 12.00 horas, na Vía Norte da cidade de Vigo, en contra da exaltación do militarismo e do belicismo e a favor da paz e da soberanía dos pobos".

O concerto, que se celebrará o 6 de xuño ás 20.00 horas, será de acceso libre e gratuíto ata completar a capacidade do recinto. O repertorio musical inclúe pezas de compositores como Ludwig van Beethoven, Serge Lancen, Philip Sparke, Samuel Hazo, Giancarlo Gazzani e Naohiro Iwai.