A iniciativa, que complementa a unidade didáctica Eu son zoqueira, permitiu ao alumnado coñecer de preto a elaboración deste calzado tradicional galego. Esta actividade forma parte dun programa máis amplo da Xunta de Galicia, que desde o ano 2023 busca achegar os oficios artesanais e os valores da artesanía aos nenos e nenas de toda Galicia.

Entre os obxectivos principais do proxecto atópanse a divulgación dos oficios artesanais como patrimonio cultural e sector económico, a posta en valor do produto feito a man e o labor do profesional da artesanía como creador e transmisor de coñecementos. Tamén se busca transmitir os valores da artesanía vinculados a un consumo responsable, á produción local e sustentable, e á economía circular, coa finalidade de favorecer a remuda xeracional nos oficios artesanais a longo prazo.

A unidade didáctica Eu son zoqueira é a primeira do proxecto e céntrase na elaboración dos zocos de madeira. O obradoiro familiar Eferro, activo desde 1915, foi recoñecido co Premio Nacional de Artesanía no ano 2019 pola súa traxectoria e por actualizar este calzado, incorporándoo á moda contemporánea.

Ademais desta, o proxecto Artesanía na Escola inclúe outras dúas unidades didácticas: Eu son artesán de percusión tradicional, que explora a historia e elaboración da pandeireta, e Eu son artesán de figuras de pan, centrada nos tradicionais amuletos de miga de pan de Santo André de Teixido.