O xurado do XI Premio de Novela Curta Antón Risco 2026 reuniuse na sede da Fundación Vicente Risco, en Allariz, para elixir a obra gañadora desta edición. Tras a deliberación, o premio, dotado con 3.000 euros e a publicación da obra, foi concedido por maioría á novela titulada "Azul", escrita por Mon G. Buhigas.

O tribunal, composto por Celia Fernández Clemente, María Elvira Moroño Suárez, Héitor Mera Herbello, Alejandro Castro Botello e Javier Rúa Soto, coa secretaria Ana Gloria Rodríguez Alonso, destacou a calidade lírica e a intensidade emocional de "Azul". Subliñaron a autenticidade da voz narrativa para tratar un tema íntimo e doloroso como é a perda dun ser querido, recoñecendo a sensibilidade e madurez literaria da autora.