O alcalde de Palas de Rei, Pablo Taboada, confirmou a recepción do proxecto para a futura estación de Inspección Técnica de Vehículos (ITV) comarcal, que se ubicará no polígono industrial da localidade. A concesionaria galega Supervisión y Control-Applus impulsa esta iniciativa, que busca reforzar os servizos públicos na comarca da Ulloa.
O orzamento da obra ascende a 1.603.916 euros, cun investimento total próximo aos 3 millóns de euros se se inclúe a maquinaria. A nova instalación, que ocupará unha superficie de 2.000 metros cadrados na terceira fase do Polígono Empresarial de Palas de Rei, contará con dúas liñas de inspección e prevé dar servizo a preto de 40.000 vehículos. Segundo fontes do Concello, esta infraestrutura suporá un aforro considerable para os veciños que actualmente se desprazan a outras estacións.
A construción da ITV está ligada á ampliación do parque empresarial xestionado por Xestur. A terceira fase do polígono, cuxa licitación está en marcha, prevé iniciar as obras de urbanización tras o verán. A idea é, unha vez obtida a licenza da ITV, simultanear a súa construción coas obras de urbanización, un proceso similar ao realizado na primeira fase do polígono.
Pablo Taboada destacou a importancia deste proxecto, que leva anos en desenvolvemento e sufriu atrasos por cuestións de terreos. "Para nós é moi importante porque a xente vai vir pasar aquí a súa inspección do vehículo e esperemos que a finais do 2027 ou primeiros do 2028 estea a pleno rendemento", afirmou o alcalde.
Ademais, o rexedor confirmou que todas as parcelas da ampliación do solo empresarial, que suman uns 20.755 metros cadrados, xa están reservadas. A presión fiscal na localidade é unha das máis baixas da provincia e de Galicia, o que atrae a empresas. Grupos como Jim Sports xa teñen a súa sede principal no polígono, e mesmo transportistas de Melide optaron por trasladarse a Palas de Rei.
Palas de Rei destaca por ter un alto índice de vehículos por habitante, con 7.841 matriculados, superado unicamente por Lugo en canto a vehículos comerciais. A localidade rexistra 2.336 camións e furgonetas radicadas ou que pagan o imposto de rodaxe alí.
A nova instalación xerará 15 postos de traballo directos e espera dinamizar o comercio e a hostalaría local. A demanda de servizos de inspección xa é alta, como demostra a presenza da ITV móbil na zona do mercado gandeiro, que require cita previa, especialmente para tractores.
O alcalde tamén sinalou que os impostos reducidos contribúen a que moitas empresas instalen aquí as súas frotas de autobuses e camións, impulsando o número de matriculacións. Taboada defende unha carga impositiva moderada como clave para o desenvolvemento do rural.
