A compañía Altri, a través da súa sociedade Greenfiber, anunciou que un informe da entidade certificadora Bureau Veritas confirma que o seu proxecto Gama en Palas de Rei cumpre coa normativa europea en materia de mitigación do cambio climático, uso de recursos hídricos, economía circular e protección da biodiversidade.
O informe, de carácter científico e legal, destaca a redución significativa de emisións de efecto invernadoiro, cun 99% menos no caso do Lyocell, e a autosuficiencia enerxética da planta a partir do excedente na produción de celulosa. Tamén se subliña a redución do 91% no consumo de auga respecto a procesos convencionais e a valorización de subprodutos como a lignina para xerar enerxía.
Non obstante, a plataforma Ulloa Viva rexeitou o informe, cualificándoo de "non independente nin con validez técnica" e considerándoo unha "provocación". Critican que Altri contratase a certificación a unha empresa que xa avalou a seguridade do Prestige e enmarcan esta acción nun intento de "propaganda" para presionar á Xunta de Galicia.
Ulloa Viva sinala que o único informe independente sobre o Proxecto Gama foi emitido polo Consello da Cultura Galega, e que este é "bastante claro" nas súas conclusións. A plataforma tamén cargou contra a "insistencia irracional e delirante" por instalar a "macrocelulosa" e cualificou o informe de Bureau Veritas de "absolutamente falso" en canto á conservación da auga, lembrando o desastre do Prestige.
Altri valora positivamente que esta avaliación estea en liña co selo STEP outorgado pola Axencia Executiva Europea de Clima, Infraestruturas e Medio Ambiente, e coa Declaración de Impacto Ambiental favorable obtida o pasado ano.
