O novo centro de estudos, situado nas antigas dependencias da biblioteca, estará operativo de luns a domingo, en horario ininterrompido de 8:00 a 21:00 horas. Contará cun sistema de acceso automatizado para persoas inscritas, garantindo a dispoñibilidade das instalacións durante toda a xornada.
Os usuarios terán acceso ao material bibliográfico da antiga biblioteca, así como a conexión á rede wifi, facilitando así os recursos necesarios para o estudo e a formación académica. A inscrición, que comeza mañá, mércores 30 de setembro, realizarase de forma presencial nas oficinas municipais e será totalmente gratuíta, ao igual que o uso das instalacións.
“"Con este novo centro queremos ofrecer un espazo cómodo e accesible para estudar e formarse, aproveitando as instalacións municipais existentes e facilitando o seu uso durante todos os días da semana."
O alcalde, Rubén García Freije, subliñou a relevancia de proporcionar á cidadanía novos servizos públicos que atendan ás súas necesidades. Destacou tamén o amplo horario e o sistema de acceso automatizado como elementos clave para a flexibilidade no tempo de estudo dos usuarios.
Esta iniciativa enmárcase no compromiso do Concello de Trabada coa ampliación e mellora dos servizos públicos de proximidade, optimizando os recursos municipais para o beneficio de toda a veciñanza.
