O Concello de Ribadeo porá en marcha ao longo dos vindeiros meses unha variada programación de actividades nos centros de ensino co obxectivo de afondar na igualdade e na diversidade. A iniciativa foi presentada onte no Consello Municipal de Mulleres.
Entre as propostas destaca unha xincana contra a violencia de xénero, dirixida a rapaces e rapazas de 1º e 2º da ESO, que se desenvolverá do 16 ao 20 de novembro. Tamén se levará a cabo un contacontos chamado 'Boti Boti' para o alumnado de educación primaria, do 23 ao 27 de novembro.
Con motivo do 25 de novembro, Día Internacional para a Eliminación da Violencia contra as Mulleres, o Concello convida a centros educativos, asociacións de mulleres, colectivos e á veciñanza a participar nun proxecto colaborativo: a creación dun mural artístico de grande formato a base de mandalas de crochet.
Xa no segundo trimestre do curso escolar, concretamente na última semana de febreiro, terán lugar obradoiros educativos sexuais impartidos por Prisma, dirixidos a alumnos de 4º e 5º de Primaria e 3º e 4º da ESO. Para o último trimestre, están previstas charlas sobre a diversidade.
Durante a reunión do Consello Municipal das Mulleres tamén se informou das actividades xa realizadas nos últimos meses. A esta xuntanza asistiron a directora xeral de Promoción da Igualdade da Xunta, Eloína Injerto, e o director territorial de Política Social en Lugo, Óscar Viñas.
O CIM (Centro de Información á Muller) propuxo a creación dun grupo de apoio para mulleres vítimas de violencia de xénero, como un novo recurso de acompañamento e apoio mutuo.
A Concellería de Igualdade recorda que o prazo de inscrición para o curso de defensa persoal feminina, que se celebrará o 12 de setembro no centro sociocomunitario de Ribadeo, está aberto ata o día 10. Ofreceranse dúas quendas, unha de mañá e outra de tarde.
Ademais, o 25 de setembro ás 20:30 horas inaugurarase o mural de homenaxe a Manuela Barreiro Pico, obra de Diego As, nun inmoble na esquina das rúas Ramón González e San Roque. O Teatro acollerá outras actividades de homenaxe a esta farmacéutica ribadense, que foi a primeira muller licenciada pola Universidade de Santiago de Compostela.
O CIM e a Concellería de Igualdade xa preparan máis actividades para as vindeiras semanas, das que se informará proximamente.
