O evento, que terá lugar o domingo 12 de abril con saída ás 15:30 horas dende a Praza de España, é froito da iniciativa de Iván Rodríguez, unha figura moi ligada ao ciclismo. A idea xurdiu a raíz dunha petición do seu fillo, Breixo, quen, tras anos de competicións por toda Galicia, España e mesmo en Holanda, preguntoulle por que non había unha proba na súa localidade.
“"Corremos por toda España, corremos en Holanda, como é posible que non teñamos unha proba en Ribadeo?"
A competición está deseñada para acoller a todas as categorías. Os máis pequenos, da categoría promesa (ata 8 anos), percorrerán un circuíto de 390 metros no parque, superando conos nunha xincana. A categoría principiante utilizará o mesmo trazado, pero con máis voltas. Para as categorías superiores (alevín, infantil e cadete), a organización decidiu recuperar un circuíto histórico de Ribadeo, coñecido como o de 'O Gallopín'.
Este percorrido, cun desnivel considerable, discorre polo paseo marítimo, ascende pola rúa Calvo Sotelo ata o cine teatro e regresa á Praza de España pola rúa peonil. Segundo Iván Rodríguez, trátase dun trazado “súper vistoso” que promete dinamismo á carreira, destacando a panorámica da zona de Guimarán ao subir por Calvo Sotelo.
“"Cando se mete a desnivel, a carreira cambia por completo."
Xa se inscribiron 200 nenos a través da páxina web da Federación Galega de Ciclismo. Unha das novidades é que se permite a participación de nenos non federados, que poden darse de alta para o día da competición. A proba está aberta a todo tipo de bicicletas, incluídas as sen pedais para os máis pequenos, e os participantes van perfectamente equipados con casco.
