Tras implementar descontos na factura eléctrica para os veciños próximos á instalación na Mariña Oriental, Recursos de Galicia iniciou conversas coas empresas destas tres localidades para deseñar tarifas eléctricas estables e competitivas. Esta iniciativa busca que o investimento en proxectos de aproveitamento de recursos naturais xere un retorno social directo no territorio.

O obxectivo é coñecer de primeira man o consumo enerxético das compañías situadas na área de influencia de Mondigo. Para iso, o conselleiro delegado de Recursos de Galicia, Emilio Bruquetas, mantivo encontros cos representantes empresariais, acompañado polos alcaldes de Trabada, Rubén García; Ribadeo, Daniel Vega; e Barreiros, Ana Belén Ermida.

Nas próximas semanas, recolleranse datos que permitirán a Recursos de Galicia deseñar unha ferramenta para trasladar aos empresarios os beneficios de ter un activo eólico na súa contorna, replicando o modelo xa iniciado co consumo doméstico. A compañía busca que as pequenas e medianas empresas (pemes) poidan acceder a vantaxes enerxéticas comparables ás das grandes corporacións, mellorando así a competitividade do tecido produtivo galego.

O parque eólico de Mondigo, adquirido por Recursos de Galicia, é un exemplo da nova eólica galega. A empresa tamén ofrece aos veciños a posibilidade de participar na propiedade do parque, reforzando a vinculación entre a produción enerxética e o territorio. A meta é que o 100% da enerxía producida en Galicia e xestionada pola sociedade repercuta na propia comunidade.

O parque, que comezou a producir a finais do ano pasado, conta con 11 aeroxeradores, 49,5 megavatios de potencia instalada e unha produción anual estimada de 131 gigavatios hora.