O grupo municipal do BNG en Ribadeo presentou unha solicitude formal ante o Consello de Contas co obxectivo de que se investiguen as "supostas irregularidades detectadas na xestión das obras do Hospital Asilo San Sebastián e San Lázaro". Esta decisión chega despois de que, segundo o partido nacionalista, "o goberno de Daniel Vega bloquease sistematicamente o acceso á información e incumprire a súa promesa de convocar de urxencia aos grupos municipais para dar explicacións".

O portavoz municipal do Bloque, Martín Graña, cualificou a situación destas obras como "escandalosa". Segundo o acta de comprobación de obras de decembro, "partidas económicas pagadas non foron executadas na realidade", o que podería significar que "se pagaron cartos públicos por traballos que son fume". Graña alertou de que isto pon en perigo as subvencións vinculadas ao proxecto, xa que un concello que certifica e paga por obras non feitas enfróntase a "un problema legal grave" e ao risco de ter que devolver axudas, xerando un "burato económico intolerable" e deixando a obra a medias.

Os nacionalistas lembran que os prazos contractuais establecían a finalización da reforma para abril de 2025. Non só se incumpriu este prazo, senón que as obras atópanse nun estado de "parálise total" dende novembro de 2025. O BNG critica que, mentres "o alcalde vende fume", as instalacións permanecen pechadas, as obras abandonadas e a xestión económica baixo sospeita, afectando a "persoas e familias de Ribadeo que precisan un servizo social crítico".

Ante esta situación, os representantes do BNG esixen acceso á documentación do expediente, un acceso que afirman que lles foi denegado en tres ocasións.