A organización agraria urxe á Consellería do Medio Rural, ao Ministerio de Agricultura e á Axencia de Información e Control Alimentarios (AICA) a tomar medidas. Segundo o SLG, a situación persiste a pesar das denuncias realizadas nas últimas semanas, afectando a granxas en localidades como Ribadeo e Ribeira de Piquín.
O sindicato informa de que, aínda que unha das granxas afectadas conseguiu atopar outra empresa para a recollida, polo menos dúas explotacións seguen sen saída para a súa produción, véndose obrigadas a tirar o leite durante máis de tres semanas. Esta situación xa fora advertida a mediados de abril.
“"As administracións miran para outro lado."
O SLG subliña que a empresa implicada está a incumprir a Lei da Cadea Alimentaria ao non preavisar coa antelación esixida de dous meses ás granxas sobre a finalización da recollida. O conflito xurdiu despois de que varias explotacións rexeitasen as propostas de contratos á baixa na renovación de abril.
A organización agraria censura esta “situación moi grave” que, ao seu xuízo, vulnera os dereitos dos gandeiros e ignora a lexislación vixente. O SLG considera que non só existe responsabilidade por parte da industria, senón tamén unha falta de resposta institucional ante un problema que ameaza a viabilidade das explotacións. Estímase que as perdas diarias para algunhas destas granxas roldan os 400 a 450 euros, e o “dobre abandono” podería levar ao peche de proxectos gandeiros.
