O Concello de Barreiros impulsa a creación dun mural colectivo que busca ser un "espazo de encontro, reflexión e expresión artística compartida para toda a veciñanza". A obra, que se materializará os días 16 e 17, ten como obxectivo principal visibilizar o compromiso da localidade coa igualdade e a erradicación da violencia machista.
A coordinación artística correrá a cargo do pintor e ilustrador Leandro Lamas, quen traballará "man a man coa comunidade", guiando a participantes de todas as idades para plasmar unha mensaxe contundente de rexeitamento ao machismo e de aposta por relacións respectuosas e libres.
Esta iniciativa forma parte dunha estratexia política "continua, decidida e transversal" do goberno municipal, segundo explican fontes do Concello de Barreiros, enfocada na prevención e visibilización dun problema estrutural.
“"A loita contra as violencias machistas non se constrúe dende os despachos, senón tecendo redes no comunitario. Este mural é política en maiúsculas: ocupamos o espazo público para visibilizar o noso compromiso irrenunciable cun concello libre de machismo."
A alcaldesa, Ana Ermida, subliñou a importancia de "levar a loita feminista ás rúas e de facela partícipe a toda a sociedade", destacando que o mural busca lembrar que esta é unha tarefa colectiva e que o goberno local está na vangarda da defensa dos dereitos das mulleres.
A característica interxeracional da actividade é un punto clave, xa que busca propiciar o diálogo entre diferentes xeracións para erradicar estereotipos e fomentar o respecto mutuo. A concelleira de Igualdade, Montse Porteiro, resaltou o labor diario en materia de igualdade, que "esixe constancia e ferramentas que impliquen directamente á veciñanza".
“"Con este mural unimos a diferentes xeracións de barreirenses nun obxectivo común: aprender xuntas, escoitarnos e deixar unha pegada artística permanente que diga non a calquera tipo de violencia contra as mulleres."
Montse Porteiro engadiu que contar cun creador como Leandro Lamas é un privilexio pola súa capacidade para captar a "alma comunitaria e a sensibilidade desta causa", e afirmou que as políticas de igualdade son unha prioridade absoluta na xestión municipal, demostrada "con feitos".
