A localidade de Barreiros, na provincia de Lugo, converteuse nun espazo de expresión artística e compromiso social coa finalización dun mural colectivo contra a violencia de xénero. A obra, desenvolvida os días 16 e 17 de xuño, estivo baixo a coordinación do recoñecido pintor e ilustrador galego Leandro Lamas e contou co apoio económico dos fondos do Pacto de Estado contra a Violencia de Xénero.
O propio Leandro Lamas cualificou a experiencia de "moi fluida" e "moi chula", destacando que o resultado reflicte "un pouco así a igualdade de feminismo". O artista subliñou a necesidade de seguir reivindicando estes principios, xa que "a estas alturas, debido a que se nota, pois parece que si que seguen sendo moi necesario".
“"Son cousas que parece que non debería facer falta reivindicar, pero segue sendo moi necesario"
A participación cidadá foi un piar fundamental deste proxecto comunitario e interxeracional. Lamas resaltou a importancia de que os veciños sintan a obra como propia, permitíndolles dicir "mañá pasan por alí e poden dicir, pois mira, os zapatos daquel pinteinos eu". O método de traballo do artista implicou organizar a participación por idades, deixando as áreas máis grandes para os máis novos e os detalles finais para os máis experimentados, asegurando así unha contribución equitativa.
Dende o Goberno municipal de Barreiros, a concelleira de Igualdade, Montse Porteiro, sinalou que o mural forma parte dunha estratexia política "continua, decidida e transversal" para previr e visibilizar a violencia machista. Valorou positivamente a metodoloxía e o traballo da súa área, considerando un "privilexio" contar con Leandro Lamas pola súa capacidade para "captar perfectamente a alma comunitaria e a sensibilidade desta causa".
A alcaldesa de Barreiros, Ana Ermida, fixo fincapé na necesidade de levar a loita feminista "ás rúas", declarando que "entendemos que a loita contra as violencias machistas non se constrúe dende os despachos, senón tecendo redes no comunitario". Cualificou o mural como "política en maiúsculas", unha forma de ocupar o espazo público para visibilizar un "compromiso irrenunciable" cun concello libre de machismo.
“"Ocupamos o espazo público para visibilizar o noso compromiso irrenunciable cun concello libre de machismo"
Ademais deste proxecto, Leandro Lamas dedica a súa carreira á pintura, destacando a creación de cadros personalizados baseados en "historias reais de xente que existe", que ilustran "contos" persoais.
