O Concello de Viveiro mantivo este luns unha reunión coas Asociacións de Nais e Pais de Alumnos (ANPA) dos centros educativos da localidade para coñecer as súas necesidades e explorar vías de colaboración municipal.
Durante o encontro, trasladouse ás asociacións a intención de incluír nos orzamentos municipais de 2027 unha subvención nominativa de 500 euros para cada ANPA. Ademais, abordouse a posibilidade de habilitar unha liña complementaria de financiamento mediante un procedemento de concorrencia competitiva, que permitiría solicitar axudas adicionais en función das actividades e servizos que desenvolvan.
Entre os posibles conceptos a financiar atópanse servizos de madrugadores e comedor, contratación de persoal coidador, organización de actividades educativas, excursións e gastos de transporte. A contía destinada a esta liña complementaria e os criterios de valoración aínda están pendentes de determinar e recolleranse en bases públicas para garantir a transparencia.
O obxectivo é avanzar na definición desta liña de axudas durante o primeiro trimestre de 2027, unha vez determinada a súa dotación económica e completados os trámites correspondentes.
