A artesá Elena Ferro visitou os centros para mostrar o proceso de elaboración dos zocos ás nenas e nenos que previamente traballaron coa unidade didáctica ‘Eu son zoqueira’. Durante as visitas, Ferro falou da relevancia histórica dos zocos, especialmente no rural galego, e realizou unha demostración en vivo.
O obradoiro familiar Eferro, de onde provén Elena Ferro (Merza, Vila de Cruces), conta con máis de cen anos de historia e foi recoñecido co Premio Nacional de Artesanía no ano 2019. A artesá adaptou o calzado tradicional ás tendencias contemporáneas, incorporando cores, texturas e formas actuais.
Artesanía na Escola é un programa da Xunta de Galicia que busca achegar os oficios artesanais e os seus valores a colexios de toda Galicia. Os seus obxectivos inclúen a divulgación dos oficios como patrimonio cultural e sector económico, a posta en valor do produto feito á man e dos profesionais da artesanía, e a transmisión de coñecementos sobre vellos saberes e novos oficios contemporáneos.
O programa tamén fomenta valores como o consumo responsable, a produción local e sustentable, e a economía circular, coa meta a longo prazo de atallar a remuda xeracional nos oficios artesanais. Actualmente, conta con tres unidades didácticas: ‘Eu son zoqueira’, ‘Eu son artesán de percusión tradicional’ (sobre pandeiretas, co artesán Xosé Manuel Sanín) e ‘Eu son artesán de figuras de pan’ (sobre sanandresiños, co artesán Jorge Bellón).
