O Concello de Viveiro comunicou hoxe, 4 de novembro de 2026, a finalización e recepción das obras de mellora das infraestruturas do parque empresarial de Landrove. Estes traballos enmárcanse na liña de axudas da Xunta de Galicia, a través da Consellería de Economía e Industria, destinadas á habilitación e mellora de infraestruturas en parques empresariais, cun orzamento subvencionable de 118.308,20 euros.
O proxecto centrouse no acondicionamento dos accesos e na conservación das infraestruturas comúns do recinto, co obxectivo principal de mellorar as condicións de circulación, accesibilidade e seguridade dentro do parque empresarial.
Entre as actuacións realizadas destaca a reparación e renovación do firme de dous viais de acceso, cunha lonxitude aproximada de 332 metros, utilizando aglomerado asfáltico nun deles e pavimento de formigón no outro. Tamén se renovou a sinalización horizontal e vertical, reparouse o pavimento podotáctil nos pasos de peóns e mellorouse a evacuación de augas pluviais mediante a ampliación da rede de sumidoiros e a instalación de elementos de drenaxe.
Ademais, o proxecto contemplou a reposición e sinalización de elementos de protección contra incendios e a colocación de sistemas de suxeición para os colectores de residuos. Os traballos desenvolvéronse nas parroquias de Landrove e Galdo.
