Os traballos, que están a piques de comezar, foron presentados como un fito significativo para a seguridade da zona, especialmente tras a riada que en 2018 asolou o barrio. A intervención centrarase en mellorar a capacidade hidráulica do río Fontecova, que atravesa Xunqueira, nun tramo de 280 metros.
As actuacións previstas inclúen o encauzamento do río mediante a execución de muros de escollera, o rebaixamento dun azud e a ampliación de dúas pontes. Estas medidas son cruciais, xa que Xunqueira está catalogada como Área de Risco Potencial Significativo de Inundación (Arpsi).
“"Esperemos que no Nadal xa poida estar este espazo distinto."
Ademais das melloras estruturais, o proxecto contempla intervencións ambientais para enriquecer o ecosistema fluvial. Colocaranse pedras no leito do río para favorecer a sinuosidade, a osixenación e crear zonas de descanso para os peixes. Tamén se naturalizará o fondo do río con material de arrastre previamente retirado.
O entorno fluvial verase mellorado coa creación dunha zona verde, a instalación dun pretil e a reposición de firmes con lousa e lastro, buscando darlle un carácter máis peonil aos viais. O orzamento inicial para esta obra roldaba o millón de euros, concretamente 985.000 euros, aínda que finalmente foi adxudicada por uns 770.000 euros. Augas de Galicia asume o 60% do custo, mentres que o Concello de Viveiro e a Deputación de Lugo achegan o 40% restante. Este montante conta con fondos do Plan de Recuperación, Transformación e Resiliencia (NextGenerationUE).
A obra, adxudicada á empresa Misturas Obras e Proxectos SA, ten un prazo de execución de oito meses. Esta actuación enmárcase dentro das iniciativas da Xunta para mellorar a resiliencia hídrica fronte ao cambio climático, un ámbito ao que os orzamentos de Augas de Galicia destinan este ano 13,4 millóns de euros, un 3,8% máis que en 2025.
