O municipio de Viveiro, xunto con O Porto do Son (A Coruña) e Baiona (Pontevedra), foi seleccionado pola Xunta de Galicia para albergar un proxecto piloto de praias inclusivas. Esta iniciativa, cun orzamento de 85.000 euros, busca mellorar a accesibilidade e o confort nos areais mediante a instalación de estruturas climáticas sostibles.

A praia de Area, en Viveiro, será o emprazamento elixido para unha destas instalacións. Segundo confirmou a alcaldesa, Mariña Gueimunde, estas estruturas ofrecerán refuxio ás persoas con problemas de mobilidade fronte a condicións climáticas adversas, como altas temperaturas, e contarán con accesos sen barreiras arquitectónicas, espazos amplos para cadeiras de rodas, sinalización adaptada e zonas de descanso.

O proxecto, aprobado polo Consello da Xunta, enmárcase na Lei de xestión e ordenación integrada do litoral de Galicia (Loxilga) e responde a esixencias de selos de calidade ambiental como a Bandeira Azul, ao mellorar a accesibilidade e a sostibilidade dos espazos públicos. Espérase que as dotacións estean dispoñibles para a cidadanía en xullo, tras a sinatura dos convenios de colaboración entre a Xunta e os concellos.