A iniciativa, que busca resarcir por ética e responsabilidade moral, culminará coa descuberta de tres monumentos nos municipios lucenses. A Comisión Pro Memorial, xunto cos cronistas locais e familiares de vítimas, presentou o proxecto que recolle o número exacto de represaliados e datos biográficos. En concreto, son 56 vítimas en Viveiro, 29 en Ourol e 8 en Muras.
A idea xurdiu tras unha petición de familiares de vítimas lucenses durante unha homenaxe en Ferrol en 2024. A Comisión estivo en contacto continuo cos alcaldes destes concellos e co cronista de Viveiro, quen elaborou un minucioso listado.
“"Era unha obriga que tiñamos cara ás mulleres e os homes que loitaron contra o franquismo, que lles custou a vida; era unha obriga que tiñamos que resarcir por ética, por responsabilidade moral e por xustiza. Había que homenaxear e lembrar aos que loitaron pola liberdade e pola democracia, sen esquecer aos seus familiares que tiveron que sufrir ao longo de 80 anos o desprestixio dos seus seres queridos, o seu esquecemento. Queremos recollelos e revivilos."
Nos actos de inauguración participarán os rexedores dos tres concellos: Manuel Requeijo (BNG) en Muras, José Luis Pajón (PSOE) en Ourol e Mariña Gueimunde (PP) en Viveiro, onde o proxecto se iniciou coa anterior alcaldesa, María Loureiro. Tamén asistirá o vicepresidente da Deputación, Efrén Castro.
A Comisión Pro Memorial convida a todos os veciños destes municipios e da comarca a sumarse ás homenaxes. En Muras e Ourol terán lugar xunto aos consistorios, mentres que en Viveiro o acto centralizarase na Praciña da Herba.
