A iniciativa, que tivo lugar o pasado domingo no restaurante O Val do Naseiro, incluíu un convite especial con baile e diversos agasallos. A rexedora local expresou a intención de manter esta celebración anualmente, destacando a importancia de recoñecer a historia viva que representan os maiores para a comunidade.
“"A verdade foi un éxito, a xente está encantada e comentaba que facía falta un encontro así porque nunca houbo nada similar en Viveiro. Os maiores meréceno, porque son historia viva do noso concello. Esta xente foron os que nos criaron, nos coidaron, traballaron para nós e ese esforzo ben paga a pena para ter aínda que sexa un día ao ano para divertirse, para celebrar e bailar."
Ademais de gozar dun completo menú e dunha sesión de vermú e baile, durante a velada entregouse un detalle ao asistente de maior idade, un veciño de Magazos de 100 anos, quen dirixiu unhas palabras e recitou para os presentes. Tamén se realizaron sorteos de dous vales de 100 euros para gastar en negocios do Centro Comercial Histórico, apoiando así o comercio local.
A rexedora tamén subliñou o compromiso do seu goberno co benestar dos maiores, promovendo a súa participación activa en diversas actividades. Entre elas, mencionou un taller de cine dirixido por un profesional recoñecido, cuxo resultado é unha curtametraxe que se proxectará o vindeiro sábado no teatro Pastor Díaz. Así mesmo, lembrou o éxito dos bailes mensuais no conservatorio e a recollida de propostas para organizar torneos de tute ou parchís, co obxectivo de ofrecer unha programación continua ao longo do ano.
