A xornada comezará ás nove da mañá coa apertura da feira. Entre as dez e a unha da tarde, os interesados poderán inscribirse nas competicións no circuíto de carreiras e realizar a medición dos cabalos na pista. A animación musical arrincará ao mediodía, ás doce, coa actuación dos gaiteiros de Bágoas da Terra, seguida dunha sesión vermú ás dúas da tarde a cargo do dúo Belinda, que tamén amenizará o serán.

Ademais das actividades tradicionais, a feira incluirá un partido de fútbol feminino que se disputará ás cinco da tarde no campo de Trasvías, engadindo unha nota deportiva á celebración.

As competicións equinas terán lugar pola tarde, a partir das catro e media. As modalidades de andadura libre incluirán serrada, chapeada e galope, con categorías para animais de máis e menos de 1,50 metros de altura. Os premios para os tres primeiros clasificados en cada modalidade serán de 150, 100 e 50 euros, ademais dun trofeo.

Tamén haberá unha categoría sub-16, con trofeos para os tres primeiros postos, e unha carreira de burros, que outorgará premios de 150, 100 e 50 euros máis trofeo. Recoñeceranse as gandarías con maior número de cabezas de vacún e equino, que recibirán 100 euros cada unha. A entrega de premios realizarase no palco ao finalizar todas as competicións. Para a reserva de curros, os interesados poden contactar a través de WhatsApp no número 698.16.16.53.