A concentración, convocada por SOS Sanidade e a Plataforma en Defensa da Sanidade Pública da Mariña, terá lugar ás once da mañá fronte ao centro de saúde de Viveiro. Ambos os partidos expresan o seu apoio á iniciativa, subliñando a necesidade de visibilizar a situación actual da sanidade.
“"A Atención Primaria é a porta de entrada ao sistema sanitario e non pode seguir sendo a gran esquecida. A falta de persoal e de recursos está a provocar unha sobrecarga insostible e unha perda evidente na calidade asistencial."
Os socialistas de Viveiro consideran fundamental a participación veciñal para defender este servizo público esencial e esixen á Xunta de Galicia que actúe con responsabilidade, reforzando o sistema sanitario e garantindo unha atención digna e de calidade para todos os galegos.
Pola súa banda, o Bloque Nacionalista Galego critica o que denomina o “desmantelamento” da sanidade pública, que, segundo afirman, “avanza a pasos de xigante nos últimos anos”. O BNG sinala que esta situación se acelerou na comarca desde a eliminación da Área Sanitaria da Mariña hai oito anos polo Partido Popular, o que levou a unha redución progresiva de servizos e á necesidade de desprazamentos para os doentes.
“"A Xunta incumpriu o seu deber de prever, organizar e investir, optando por un modelo que expulsa aos profesionais e desprotexe á cidadanía."
A portavoz vivariense Iria Cotelo afirma que “a situación en Viveiro é insoportable” e censura que “o PP non pode seguir xogando coa nosa saúde”. Os nacionalistas tamén lembran as carencias en concellos como O Vicedo, Ourol e O Valadouro, onde a poboación percibe unha redución significativa de facultativos, e aluden á posibilidade de peche de servizos no centro de saúde de Foz.
