A proposta do PSOE de Viveiro busca honrar a Semana Santa, unha festividade que, segundo os socialistas, demostra cada ano a súa “dimensión excepcional” tanto pola participación local como pola afluencia de visitantes. Esta celebración, xa declarada de Interese Turístico Internacional, consolídase como un dos principais referentes culturais, relixiosos e turísticos da cidade.
Estamos ante unha celebración que non se entende sen o seu pobo, construída grazas ao compromiso e a implicación de xeracións enteiras de veciños e veciñas.
Máis aló do impacto económico e turístico, o Partido Socialista subliña que a verdadeira forza da Semana Santa de Viveiro reside no seu carácter profundamente popular. A moción destaca o papel fundamental das confrarías, coordinadas pola Xunta de Confrarías, así como das bandas de música, dos voluntarios e colaboradores, e do conxunto da veciñanza. Resáltase especialmente o relevo xeracional que garante a continuidade desta arraigada tradición.
Os socialistas argumentan que practicamente todas as familias de Viveiro teñen algún vínculo coa Semana Santa, xa sexa participando nas procesións, colaborando na organización ou formando parte das bandas. Esta implicación colectiva e desinteresada é o que, segundo eles, fai única a “Nosa Semana Grande”.
Prácticamente todas as familias de Viveiro teñen algún vínculo coa Semana Santa, ben sexa participando nas procesións, colaborando na organización ou formando parte das bandas. Esa implicación colectiva e desinteresada é o que fai única á nosa Semana Grande.
Por todo isto, o PSOE considera que é o momento de que o Concello realice un recoñecemento institucional “á altura do que representa a Semana Santa de Viveiro, non só como evento, senón como expresión viva da identidade, da historia e do compromiso colectivo da vila”. A proposta contempla que a Medalla de Ouro se conceda á Semana Santa vivariense con carácter simbólico e colectivo, estendendo o recoñecemento ao conxunto do pobo vivariense, representado na Xunta de Confrarías, as confrarías, as bandas de música e todas as persoas que, de maneira altruísta, contribúen ano tras ano ao seu éxito.
