A localidade de Viveiro convértese dende este venres, e ata o vindeiro 16 de agosto, nun punto de encontro para a artesanía tradicional coa apertura da súa 42ª feira. O evento, organizado pola asociación Proa, terá lugar nos xardíns Noriega Varela.
Os visitantes poderán desfrutar dunha ampla oferta de 30 postos que chegan de diferentes puntos de España, mostrando disciplinas como a cerámica, o téxtil, a madeira, a xoiería, a cosmética natural ou o vidro. A feira estará aberta en horario de mañá, de 11:00 a 14:30, e de tarde, de 17:30 a 22:00.
Como novidade, a feira contará cun stand efímero que se renovará ao longo dos días para dar visibilidade a novos proxectos. Ademais, haberá unha exposición titulada 'A vida ao teu lado ten cor' da artista Miriam Viveiro.
“"É unha cita imprescindible do verán viveirés, que contribúe a dinamizar a cidade, apoia o traballo das persoas artesás e ofrece unha proposta cultural e comercial de gran atractivo para a veciñanza e para quen nos visita."
Dende o Concello anímase á cidadanía a achegarse aos xardíns Noriega Varela para descubrir o traballo dos creadores participantes, que realizarán demostracións en vivo, ademais de expor e vender as súas pezas.
