A rexedora local subliñou a relevancia desta celebración, que cumpre a súa 40ª edición, consolidándose como unha tradición moi arraigada e querida pola veciñanza. Destacou que é un día de festa, de encontro e de homenaxe a aqueles que tanto achegaron ao desenvolvemento do concello ao longo das súas vidas.

Desde o Concello, aposta firme por integrar aos maiores nas políticas públicas, valorando a súa experiencia e os seus valores. A xuntanza serve tamén para animalos a gozar da vida e sentirse protagonistas e orgullosos de formar parte da comunidade de Cervo.

Esta festa, que se creou en Sargadelos e foi pioneira na Mariña, permite o reencontro de persoas de distintas parroquias que, co paso dos anos, non teñen tantas oportunidades de socializar. A gran acollida levou a que, co tempo, a celebración se trasladase a unha carpa para poder acoller a todos os participantes, xa que os restaurantes non tiñan capacidade suficiente.

A organización do evento require un esforzo considerable, polo que a rexedora agradeceu o traballo de todo o persoal municipal, colaboradores, servizo de catering e, especialmente, á concelleira de Servizos Sociais, pola súa implicación. Ademais, este ano houbo sorpresas como a proxección de fotografías dos 40 anos da celebración e un vídeo da primeira edición, ofrecendo unha emotiva viaxe no tempo.

O Día do Xubilado tamén serve como colofón aos torneos de tute e parchís, nos que participaron 13 parellas en tute e 8 en parchís. Máis alá da competición, estas actividades promoven a convivencia, a amizade e o mantemento da actividade entre os maiores. O Concello de Cervo tamén colabora con asociacións como a de xubilados Terra e Mar e desenvolve o programa de envellecemento activo Arruguiñas, que inclúe obradoiros de inglés, aprendizaxe dixital, memoria, ximnasia, lingua de signos e manualidades, fomentando a interacción e o lecer.