A mobilización, impulsada por SOS Sanidade Pública e a Plataforma Sanitaria da Mariña, contou tamén co apoio do PSOE e o BNG. A elección de Viveiro como punto de protesta débese a que o seu centro sanitario é considerado o que acumula máis problemas asistenciais crónicos na comarca.
Os convocantes subliñan que o centro de Viveiro só dispón dunha pediatra desde o ano 2020, cando debería ter dúas. Ademais, a dotación de médicos de familia apenas alcanza o 50 por cento do necesario, con días nos que só dous ou tres facultativos atenden a totalidade das consultas.
“"Quenes derogaron o plan de mellora de Atención Primaria segundo puxeron un pé no Goberno da Xunta, quenes desviaron millóns e millóns de euros cara á privada, quenes precarizaron ao persoal, quenes desestabilizaron e destruíron a sanidade pública, son os responsables directos do estado no que se atopa nestes momentos a Atención Primaria e son os culpables do sufrimento, do agravamento de enfermidades e de moitos desenlaces fatais."
Entre as demandas principais, SOS Sanidade Pública e a Plataforma Sanitaria esixen que o 25% dos orzamentos da consellería se destine á Atención Primaria. Tamén reclaman a cobertura total do persoal sanitario e administrativo, a incorporación de novas categorías profesionais e o aumento das xa deficitarias.
Outras peticións inclúen o desenvolvemento de estratexias de saúde comunitaria, a loita contra o uso excesivo de medicación como alternativa á falta de atención, unha maior énfase na saúde mental e no coidado das persoas maiores, e a promoción dunha formación de calidade para todo o persoal sanitario.
