Con moita ilusión e algúns nervios, Naike Neira abre as portas de Retorta, un novo establecemento de artesanía e agasallos situado no número 9 da rúa Zapatería, en Viveiro. O local, que antigamente albergou a librería Neira, pertencente á mesma familia, acolle dende este sábado a inauguración deste proxecto, que comezará a súa actividade en horario normal a partir do vindeiro luns. A nova tenda tamén se sumou á asociación Centro Comercial Histórico.
A inauguración contará cun pequeno acto con pinchos para que os asistentes poidan coñecer o establecemento. Entre a variedade de artigos que ofrecerá Retorta destacan complementos artesanais en cerámica de Iria Pigueiras, xoiería en madeira de Pura Garra, pezas de cerámica de Esquina Atlántica, navallas de Rodil e outros agasallos singulares e de difícil atopar. "Quero poñer en valor a artesanía feita con tempo e de aquí", subliña Neira, destacando que son produtos de artesáns da provincia e que a artesanía é un agasallo axeitado para todo o ano.
A decisión de abrir esta tenda veu motivada pola dispoñibilidade do local e polo desexo de conciliar a vida laboral coa familiar. Neira, que medrou no negocio familiar da librería, onde traballou xunto á súa avoa e nai, decidiu apostar por este novo proxecto nun espazo que xa tivo actividade comercial entre 2014 e 2018. A fundación orixinal da librería familiar remóntase a 1949.
O espazo foi adaptado para a súa nova función, conservando elementos orixinais como o chan e as paredes de pedra. Ademais, conta cun chibalete da antiga imprenta familiar e outras antigüidades que serven de exposición.
