As constantes roturas na vella canalización de fibrocemento en Landrove provocan interrupcións no subministro de auga a numerosas vivendas da zona. A obra, que implica a substitución de aproximadamente 500 metros da rede desde o inicio da LU-161, é considerada prioritaria.
“"Pedimos desculpas á veciñanza por esta demora."
O tenente de alcaldesa, Martín Vale, explicou no último pleno que a nova previsión da empresa Viaqua é iniciar os traballos a finais de abril ou principios de maio. Este atraso débese a que a concesionaria está inmersa noutras obras, como a de saneamento en Celeiro e outra en As Aceñas, que levaron máis tempo do planificado.
Esta resposta do goberno municipal xurdiu a raíz dun rogo do BNG, que demandaba a “renovación urxente” da rede de abastecemento de Landrove. A portavoz nacionalista, Iria Cotelo, subliñou que a situación non é puntual, senón consecuencia do deterioro dunha infraestrutura de hai 40 anos. O tramo entre o inicio da estrada LU-161 e a Etap é o que acumula máis incidencias, e o BNG xa presentara unha moción en decembro para a súa renovación.
“"É inaceptábel que a veciñanza de Landrove siga sufrindo cortes de auga e molestias constantes pola falta de mantemento dunha rede claramente obsoleta."
No mesmo pleno, o PSOE, a través do edil Jesús Fernández, esixiu transparencia sobre a obra de Xunqueira, adxudicada en marzo para minimizar o impacto das inundacións. O PSOE solicitou información sobre a empresa adxudicataria, o calendario de execución e a contía final que achegará o Concello, xa que o orzamento pasou de 812.000 a 770.000 euros.
Martín Vale rexeitou as acusacións de opacidade, afirmando que a adxudicataria é Misturas, Obras e Proxectos SA, e que a información é pública. Tamén recordou que as expropiacións para esta obra tiveron que realizarse con urxencia, xa que non foran xestionadas polo anterior goberno municipal.
