O programa Nnbata, unha iniciativa levada a cabo en colaboración co Concello de Burela e Arraianas, co financiamento da fundación La Caixa, proporcionou acompañamento xurídico, psicolóxico e social a un total de 139 persoas migrantes. Delas, 111 acudiron principalmente en busca de asesoramento sobre o proceso de regularización, aínda que tamén se abordaron outras necesidades persoais, administrativas e sociais.
A asistencia cubriu diversos trámites, como permisos de residencia, expedientes de asilo e refuxio, homologacións de títulos de bacharelato, preinscricións laborais e outras xestións administrativas. Para os procesos de regularización, entregouse o certificado de vulnerabilidade ás persoas que o requiriron.
Ademais do apoio xurídico, o programa incluíu atención psicolóxica e social, ofrecendo orientación sobre situacións cotiás e facilitando o acceso a recursos para a integración na sociedade de acollida.
“"Hai unha implicación non só laboral, senón tamén social, de todos estes procedementos, posto que cremos que iso é o fundamental para a comunidade que formamos na veciñanza de Burela."
Mario Pillado, tenente de alcaldesa e concelleiro de Inmigración, destacou a importancia desta dimensión social, subliñando que os trámites administrativos forman parte dunha realidade persoal e social que tamén precisa atención. O programa tamén organizou unha charla informativa sobre o proceso de regulación o 23 de abril, que tivo que dividirse en dúas sesións pola alta participación.
O Concello resalta que este tipo de acompañamento permite abordar as necesidades dun proceso migratorio dende unha perspectiva ampla. Pillado tamén puxo en valor o traballo e a implicación do Concello e do equipo de Arraianas, especialmente polo esforzo adicional realizado para responder ás necesidades da poboación migrante ante a excepcionalidade da situación derivada do proceso de regularización extraordinaria.
