A iniciativa ‘Comercio Compensa’, promovida pola Xunta de Galicia, busca fomentar hábitos de compra responsables, impulsar o uso de alternativas reutilizables e pór en valor o comercio de proximidade. Durante a xornada, instalouse un punto informativo na praza do Concello onde se entregaron bolsas de tea coa imaxe da campaña a quen presentaron un tícket de compra nos establecementos do municipio.
Gabriel Alén sinalou que esta visita é a primeira ao municipio desde que a Asociación de Comerciantes, Industriais e Autónomos de Burela se incorporou á rede de centros comerciais abertos de Galicia, que xa conta con 56 entidades. Destacou que esta incorporación avala a traxectoria da entidade e contribuirá a fortalecer a súa labor na dinamización do comercio local.
A campaña ‘Comercio Compensa’ percorrerá un total de 60 localidades galegas entre este ano e o vindeiro. O seu obxectivo é achegar á cidadanía mensaxes de sensibilización sobre consumo responsable e impulsar o comercio local como motor económico e social.
