Esta convocatoria supón un recoñecemento ao crecemento das xogadoras do conxunto laranxa e chega despois de que o equipo sumase un valioso punto fronte ao Alcorcón, un dos clubs máis potentes da Primeira División feminina de fútbol sala.

Lola Muñoz, porteira nacida en Palma del Río (Córdoba) en 2008, forma parte da estrutura do club burelés dende os 9 anos. A súa traxectoria inclúe convocatorias coas seleccións galegas en categorías inferiores (infantil, cadete e xuvenil) e xa debutou coa selección española na tempada anterior.

Pola súa banda, a á-peche Irene Suárez, que cumpriu 19 anos en xaneiro, formouse nas escolas deportivas do Ribadeo FS e do FSF Castro entre 2018 e 2023. Posteriormente, fichou polo Burela FSF para integrar o cadro de xogadoras do filial na campaña 2023-24.

Tras destacar no filial, Irene Suárez tivo que afrontar unha grave lesión que a mantivo afastada dos terreos de xogo durante sete meses na tempada 2024-25. Con todo, a súa recuperación permitiulle participar no tramo final da competición, demostrando a súa calidade e gañándose un posto no primeiro equipo. Recentemente, deixou a súa pegada cun gol memorable en Poio.