Un home e tres mulleres, dúas delas nai e filla, recoñeceron os feitos e alcanzaron un acordo coa Fiscalía, que inicialmente solicitaba condenas de entre tres anos e medio e catro anos e medio de cárcere.
Segundo o escrito de acusación, unha das acusadas dedicábase á distribución de cocaína en Foz dende, como mínimo, principios de 2020. Os compradores contactaban telefonicamente e concertaban encontros en distintos puntos da localidade para realizar transaccións de pequenas cantidades. No seu domicilio incautáronse 8,6 gramos de cocaína cun valor de 720 euros no mercado ilícito.
O principal acusado, tamén veciño de Foz, actuaba como provedor para esta muller e ademais vendía cocaína e outras substancias a clientes propios. Tras a súa detención, rexistráronse o seu domicilio en Mañente e unha vivenda compartida en Barreiros, onde se interviron máis de 53 gramos de cocaína en distintas cantidades e purezas, cun valor total de máis de 2.000 euros, que o acusado proxectaba destinar ao tráfico.
As outras dúas acusadas, nai e filla, colaboraban co home na distribución de estupefacientes, atendendo chamadas e desprazándose por Foz e Barreiros para efectuar as vendas. As partes acordaron a suspensión da pena para elas.
