O goberno local de Burela somete este xoves a aprobación inicial, nun pleno extraordinario, a nova Relación de Postos de Traballo (RPT) municipal. Este documento organizativo, que a alcaldesa, Carmela López, considera "histórico", é unha ferramenta que o Concello intentaba implantar dende o ano 2007.

A proposta chega tras un proceso de negociación coa representación sindical e inclúe o organigrama administrativo, fichas descritivas dos postos, valoración técnica, cadro de persoal, manual de valoración e plan de promoción interna. "Non estamos ante un documento calquera, senón ante unha ferramenta clave para ordenar o Concello, definir postos, funcións e responsabilidades e adaptar a organización municipal á realidade actual", subliñou a rexedora.

A rexedora lembrou que o primeiro intento de implantar unha RPT en Burela data de 2007, e dende entón "producíronse diferentes procesos de negociación que non chegaron a culminar". López destacou que o avance foi posible "porque houbo vontade política para desbloquear o proceso, predisposición ao diálogo por parte do goberno local e unha participación construtiva da representación sindical".

A proposta de RPT foi negociada coa representación da plantilla municipal e contou co acordo unánime da mesa xeral de negociación. Posteriormente, adaptouse á saída da Unidade de Drogodependencias, que asume a Xunta, e volveu ser apoiada unanimemente na mesa xeral do 30 de abril.

Carmela López aclarou que a RPT "non é unha subida lineal de soldos nin un reparto sen criterio, senón unha valoración técnica realizada por posto, atendendo ás funcións, responsabilidades, requisitos, dependencia orgánica e características específicas de cada emprego municipal".

Para o goberno municipal, a aprobación da RPT supón "un paso importante para mellorar a organización interna do Concello, avanzar nunha administración máis clara e eficaz e recoñecer de maneira máis axeitada o traballo que desenvolve o persoal municipal".