O recente encontro futbolístico entre España e Cabo Verde, que rematou cun empate a cero, xerou unha importante polémica nas redes sociais. A protagonista foi a tiktoker Alimatu Sadiya, coñecida como Tutti Sadiya, quen se enfrontou aos populares streamers Ibai Llanos e Gerard Piqué polas súas predicións sobre o resultado do partido.
Antes do encontro, Ibai Llanos prognosticou unha vitoria de España por 5-0, mentres que Gerard Piqué elevou a aposta a un 9-0. Estas cifras molestaron profundamente a Sadiya, de orixe senegalesa e residente en Burela, quen sentiu que se estaba menosprezando ao equipo africano. "Sentín que estaban a subestimar a unha selección formada por xogadores profesionais, que tamén traballan moi duro", explicou a influencer.
“"Teñen que pedir perdón, porque xa cando un mete a pata, sábeo, e meteron a pata ata o fondo."
Movida pola indignación, Tutti Sadiya, que xa contaba con medio millón de seguidores, publicou un vídeo nas súas redes sociais recriminando aos streamers a súa falta de respecto e etiquetándoos directamente. O seu obxectivo, segundo afirmou, era "defender a Cabo Verde e pedir un pouco máis de respecto cara ao fútbol africano". A influencer relatou a vehemencia da súa reacción ao ver as predicións: "Póñome de pé, díxenme 'isto non pode ser posible', 'agora mesmo contéstolles'". Ademais, xustificou por que decidiu nomear directamente a Llanos e Piqué no seu vídeo: "Nas redes sociais, se subes un vídeo e non etiquetas ou nomeas á persoa, parece que estás a falar por detrás das persoas, e eu non son destas persoas".
A resposta dos influencers non se fixo esperar. Ibai Llanos publicou outro vídeo no que se amosaba sorprendido de que lle "funase unha señora caboverdiana" e procedeu a pedir desculpas por ser tan "tonto".
A polémica xerou unha enorme repercusión, multiplicando as visualizacións e seguidores na conta de Tutti Sadiya. A propia influencer recoñeceu que o impacto "foi brutal" e que nunca imaxinou que "chegaría tan lonxe". Este crecemento supuxo para ela traspasar unha nova fronteira no mundo das redes sociais. Sadiya describe a interacción na rede como un partido paralelo ao que se xoga no campo. "É un partido como a nivel redes sociais, onde coas nosas opinións, que son o balón, nos as imos lanzando", comentou sobre a dinámica viral que se xerou. A pesar da magnitude do balbordo, séntese orgullosa da súa actuación en defensa dos xogadores de Cabo Verde.
