A feira de produtos do mar e da terra, artesanais e ecolóxicos Produart abriu este venres as súas portas na nave de redes do porto de Burela. O acto institucional contou con intervencións que louvaron os produtos do sector primario e o ecolóxico, así como o escaparate que supón esta feira para eles.
O xerente da fundación Expomar, José Manuel González, coñecido como 'Brais', lembrou que a cita chega á súa 24ª edición e medra con preto de 60 expositores. Destacou a capacidade dunha feira que naceu en 2003 coa intención de facer "un gran fin de semana en Burela", xunto á Feira do Bonito, e que hoxe é "algo máis que unha plataforma de todos os sectores produtivos do mar e da terra".
O concelleiro do Mar burelés, Ramiro Fernández Rey, agradeceu o traballo de 'Brais', do persoal do municipio e dos expositores. O edil subliñou a idea clave de "consumir o noso e valorar o que somos".
A conselleira do Mar, Marta Villaverde, avogou por pór en valor a vinculación de Galicia co sector primario e a produción ecolóxica, afirmando que "está no noso ADN". Asegurou que "iniciativas como Produart contribúen a reforzar unha forma de producir e consumir responsables, ao tempo que serven de escaparate para os produtos elaborados en Galicia".
A conselleira destacou que esta cita, xunto coa Feira do Bonito, "conforman un escaparate privilexiado para promocionar a calidade dos produtos galegos, ademais de contribuír á dinamización económica, social e turística da Mariña".
A alcaldesa de Burela e presidenta da Deputación, Carmela López, celebrou ver "a nave das redes chea de vida e movemento" cunha feira que "24 anos despois segue medrando". Engadiu que "este tipo de iniciativas son as que sosteñen os nosos concellos. Dan traballo, visibilidade, traen xente á comarca e axudan a que oficios como a artesanía ou a produción ecolóxica teñan futuro".
O compromiso, segundo López, é "coidar esta feira e facela medrar sen perder o que a fixo especial".
Ao acto tamén acudiu o delegado da Xunta en Lugo, Alfonso Villares, entre outras autoridades vinculadas ao sector pesqueiro.
A feira estará aberta ata o domingo cun amplo programa de actividades paralelas.
