O suceso tivo lugar arredor das 08.45 horas na zona de Piñeira de Arcos. Segundo as primeiras informacións, o vehículo, que transportaba preto de 180 porcos vivos, saíuse da vía e envorcou mentres o condutor realizaba unha manobra de cambio de sentido en dirección a Santiago.

Tras o impacto, parte dos animais quedaron espallados pola calzada, mentres que outros permaneceron atrapados no interior do remolque. O condutor, que deu negativo nas probas de alcol e drogas, puido abandonar o vehículo polos seus propios medios antes de ser atendido polos servizos de Urxencias Sanitarias de Galicia-061.

Ao lugar do accidente desprazáronse efectivos do parque comarcal de Xinzo de Limia, que se encargaron das tarefas de rescate dos animais, así como axentes da Garda Civil de Tráfico para regular a circulación na zona.