A localidade de Couso Galán, situada no Concello de Sarreaus, volve ser o epicentro do Paseo da Lana, que na súa sexta edición pon o foco nos oficios tradicionais ligados á produción artesanal de lá con denominación de orixe. O encontro serve de punto de confluencia para produtores, expertos en procesado, hilado, tintado e teceduría, así como para proxectos que buscan reactivar a economía rural a través da produción local de lá e outras fibras, controlando todo o proceso dende a orixe ata o produto final.
A xornada inaugural contou cunha destacada pasarela lanar, onde se presentaron sete desfiles de pezas elaboradas con lá, cinco de produtos e dous de coleccións de autor. As pezas, confeccionadas con lá de raza galega e merina, amosaron diversas técnicas e a combinación da lá con outros materiais.
Entre os creadores presentes atopábase Fran Vilanova, con taller en Ribadavia, quen participa por quinta vez no evento. Vilanova destacou o crecente apoio á artesanía galega e a importancia de "pór en valor os materiais e produtos feitos a man", subliñando o valor do "proceso lento e o esforzo que require" fronte á rapidez da sociedade actual.
Como novidade desta edición, a organización abriu a feira lanar para permitir aos asistentes, moitos deles desprazados de lonxe, gozar dos produtos artesanais. A feira, aberta hoxe e mañá pola mañá, ofrece artigos de artesáns locais e doutras partes do territorio nacional e de Portugal. Un exemplo é Lidia Sánchez, toledana afincada en Allariz, que visibiliza o oficio do gancho e a calceta con tinguidos naturais, nunha aposta pola sostibilidade e un oficio en risco de desaparición. Sánchez, que traballaba nunha multinacional en Madrid, reinvindicou este camiño tras unha crise persoal.
Ademais da feira, o evento inclúe obradoiros e faladoiros divulgativos. Hoxe, a investigadora da Universidade de Oviedo, Llara Fuente, presentará o proxecto europeo "Harris Tweed: oportunidades e problemáticas", abordando a artesanía en zonas rurais dende a perspectiva dos materiais, a economía de proximidade e a comunicación.
O evento conta co apoio da Xunta de Galicia. O director de comercio, Gabriel Alén, sinalou a importancia destes encontros como "un escaparate vivo para a posta en valor destas fibras, da artesanía consciente e do desenvolvemento rural."
