A directora xeral de Promoción da Igualdade, Eloína Ingerto, visitou hoxe as nenas e nenos que participan no campamento da asociación Capaces, que apoia ás persoas con Trastorno do Espectro Autista (TEA). A actividade desenvólvese no albergue Porta Santa de Baleira.
Durante o encontro, Ingerto puxo esta iniciativa como exemplo dunha actividade totalmente integradora que combina a conciliación familiar e a inclusión social. Destacou a importancia de ofrecer actividades de conciliación adaptadas aos nenos e nenas con discapacidades, que potencien as súas habilidades e autonomía, e que sirvan de recurso para as familias durante os períodos non lectivos.
A directora xeral explicou que o Goberno galego financia esta iniciativa con 25.000 euros, cofinanciada a través do Plan Corresponsables do Ministerio de Igualdade. Subliñou o compromiso da Xunta coa conciliación familiar como elemento esencial para avanzar en igualdade, e resaltou a colaboración entre a Administración autonómica e o tecido asociativo.
