Os municipios da área metropolitana están a impulsar diversas iniciativas para frear as condutas incívicas que agreden o medio natural das Mariñas. En particular, o Concello de Sada manifestou a súa preocupación polo notable incremento de verteduras irregulares no seu territorio, subliñando as graves consecuencias que estas accións teñen para o medio ambiente.
Nas últimas datas detectáronse diversas verteduras incontroladas en distintos núcleos. Trátase de depósitos de residuos, moitos deles en zonas illadas ou de pouco tránsito, que supoñen un grave prexuízo para o medio ambiente, ademais de deteriorar a imaxe e o estado do noso entorno.
As autoridades sadenses recalcan que estas actitudes son irresponsables e incívicas, máxime cando existe un servizo de recollida de enseres xestionado polo Consorcio As Mariñas. Ante esta situación, iniciáronse investigacións para identificar os autores, tarefa da que se encarga a Policía Local de Sada, xa que estas condutas son sancionables.
A pesar da dificultade para atopar os responsables, o goberno local, liderado por Benito Portela, fai un chamamento á colaboración cidadá. Pídese aos veciños que, en caso de detectar algún depósito irregular, o comuniquen ao Concello de Sada para poder actuar con rapidez e adoptar as medidas oportunas.
Ademais do dano ambiental, os munícipes lembran que este tipo de comportamentos xeran un custo económico que repercute directamente no peto de toda a veciñanza. Insisten en que tanto cidadáns como empresas teñen a obriga legal de xestionar adecuadamente os residuos xerados, para o que dispoñen do servizo de recollida de enseres domésticos do Consorcio das Mariñas, que permite depositar os residuos nos contedores os mércores a última hora da tarde, previa comunicación no teléfono 981 795 524.
