A decisión, publicada no Boletín Oficial da Provincia, oficializa o acordo aprobado por unanimidade no último pleno ordinario. Este traspaso afecta a varias vías, identificadas como DP-5803, DP-5804, DP-5805, DP-5806, DP-5808 e DP-5809.

Segundo a institución provincial, estas estradas posúen un “carácter marcadamente urbano”, o que xustifica a súa xestión directa por parte do concello. A cesión é gratuíta e abrangue os terreos, as construcións e todos os elementos funcionais asociados ás vías, cun valor conxunto estimado en 6,6 millóns de euros.

Entre os tramos transferidos atópanse 953 metros que van da Pasaxe a Perillo, o acceso á praia de Santa Cristina (446 metros), o acceso á praia de Bastiagueiro (196 metros), a prolongación cara ao mar da AC-190 en Coruxo (419 metros), e o tramo de Pousada a Edreira.

A Deputación subliña que as vías entregadas se atopan en óptimo estado de conservación. Este movemento forma parte dunha estratexia para “racionalizar a súa rede viaria”, distinguindo entre as estradas con función provincial e aquelas que, pola súa integración no tecido urbano, son máis axeitadas para a administración municipal.

O acordo establece que o Concello de Oleiros deberá manter a afectación ao dominio público dos bens cedidos durante os 30 anos seguintes á aprobación da transmisión. A partir de agora, todos os gastos, investimentos e actuacións relacionadas con estas vías serán responsabilidade exclusiva do municipio.