O informe, que abarca o período de xaneiro a marzo de 2026, recoñece un ecosistema en proceso de maduración, con proxectos que avanzan na súa tramitación. Non obstante, os seus responsables salientan a necesidade de que estas iniciativas acaden a decisión final de investimento, pechen acordos de demanda e progresen no desenvolvemento da rede eléctrica, un punto crítico que condiciona o avance de varias propostas.
Ao peche do primeiro trimestre, seis proxectos tiñan tramitación activa en Galicia: Valle H2 A Coruña (Ignis), H2Pole, Accionaplug, Green Meiga, Triskelion e Julio Verne. Esta concentración reflicte unha tendencia observada en España e Europa, onde o sector pasou dunha fase de anuncios a unha selección de proxectos con maior solidez técnica e financeira.
Entre os fitos máis destacados do trimestre atópase a Declaración de Impacto Ambiental (DIA) favorable para Accionaplug en Morás, Arteixo, un proxecto de 20 MW e 2.990 toneladas anuais de hidróxeno verde. H2Pole, en As Pontes, cunha capacidade prevista de 16.000 toneladas anuais e un investimento estimado de 156 millóns de euros, tamén progresa. Pola súa banda, Green Meiga, en Begonte, aspira a producir 100.000 toneladas anuais de metanol verde cun investimento aproximado de 500 millóns de euros e entrada en funcionamento prevista para 2027.
“"Este primeiro informe permítenos dispoñer dunha fotografía rigorosa de onde estamos. Galicia ten activos reais para desenvolver o hidróxeno verde, e o obxectivo agora é que eses activos se convertan en proxectos operativos."
O documento tamén destaca un contexto regulatorio e financeiro favorable, co Real Decreto 149/2026, aprobado en febreiro, que reforza a participación española nos esquemas europeos de apoio ao hidróxeno. A segunda convocatoria do Banco Europeo, publicada polo IDAE o 18 de marzo cunha dotación de 440,5 millóns de euros, e a convocatoria do Clean Hydrogen Partnership de Horizonte Europa, son as principais oportunidades de financiamento.
En canto á situación en Galicia, o informe subliña que o 84,6% da enerxía producida é de orixe renovable. Ademais, a comunidade dispón de infraestruturas portuarias na Coruña, Ferrol e Vigo con potencial para converterse en nodos loxísticos, e conta con solo industrial dispoñible en enclaves como As Pontes e Meirama. A consolidación de modelos de negocio e o peche de acordos de demanda industrial son as prioridades inmediatas para que os proxectos galegos accedan a financiamento bancario e privado.
