A poucas semanas da proba, o ritmo de inscricións para a XX edición da carreira popular Coruña10, que terá lugar o vindeiro 4 de outubro, aumenta significativamente. A data de hoxe, xa hai máis de 1.600 persoas anotadas entre as diversas categorías, apenas dúas semanas despois da apertura do prazo.
A vindeira semana será a última oportunidade para inscribirse coa tarifa reducida de 10 euros. O prazo remata o domingo 16, a través da páxina web de Carreiras Galegas. Posteriormente, abrirase o prazo ordinario (15 euros) ata o 25 de setembro, seguido dun prazo extraordinario (25 euros) entre o 26 e 27 de setembro, suxeito á dispoñibilidade de prazas.
A oferta inicial lanzada polo Concello da Coruña e a Federación Galega de Atletismo (FGA) é de 3.000 prazas. En función da demanda, prevese habilitar unha listaxe de agarda para emitir dorsais extra.
O concelleiro de Deportes, Manuel Vázquez, lembrou que haberá bonificacións especiais para persoas desempregadas, maiores de 65 anos e familias numerosas á hora de inscribirse.
O campión de España nos 1.500 metros, o viveirense Adrián Ben, xa confirmou a súa participación. Ao deportista galego, recentemente galardoado coa Medalla Castelao, sumaranse proximamente máis referentes do atletismo, que o Concello e a FGA irán anunciando de forma progresiva.
