A Noche Europea de las Personas Investigadoras chega á Dársena da Marina da Coruña o vindeiro venres 25 de setembro, entre as 18:00 e as 21:00 horas. O Centro Interdisciplinar de Química e Bioloxía (CICA) da Universidade da Coruña participará nesta xornada cunha oferta de oito propostas divulgativas deseñadas para achegar a investigación científica á cidadanía de todas as idades.
A través de experimentos prácticos, xogos interactivos e observacións ao microscopio, os asistentes poderán explorar a contribución da química e a bioloxía á comprensión do noso contorno e á busca de solucións para retos actuais en materia de saúde, sustentabilidade e enerxía. Esta iniciativa tamén brindará a oportunidade de dialogar directamente co persoal investigador e coñecer de preto o seu labor.
Baixo o título "CICA: ciencia para a saúde, a sustentabilidade e a enerxía", o stand do centro albergará sete actividades que guiarán ao público dende a escala nanométrica ata o estudo dos ecosistemas mariños e terrestres. Entre elas, destacan propostas como "Fabrica a túa propia batería" para entender o almacenamento de enerxía renovable, "Detectando o cancro de ovario" sobre novos métodos de diagnóstico, ou "Poliquetos: os mini extraterrestres mariños" para coñecer a fauna da praia.
Outras actividades incluirán "Vermello como o ouro: propiedades sorprendentes dos nanomateriais" para observar nanopartículas, "Viaxes a través do ADN" para aproximarse á investigación xenética, "Constrúe a túa propia proteína!" onde o público creará pequenas proteínas a partir do código xenético, e "Protexemos o solo fronte á erosión" con experimentos sobre cubertas vexetais e materia orgánica.
Ademais, o grupo GRICA Biopast presentará o taller "Os (micro)fósiles e a paleoecoloxía", explicando como os sedimentos lacustres axudan a reconstruír climas e paisaxes pasadas. Incluirase a demostración dun equipo de sondeo e a análise de restos fósiles como grans de pole e diatomeas, coa participación das investigadoras Laura Barral Fraga e María Eugenia Fernández Pérez, do CICA, e Luisa Santos Fidalgo, da Facultade de Ciencias da UDC.
Con esta participación na G-Night 2026, o CICA busca difundir o coñecemento xerado nos seus laboratorios, espertar a curiosidade científica e fomentar o diálogo entre a comunidade investigadora e a sociedade. As actividades reflicten a diversidade da investigación do centro e a súa conexión co enfoque One Health, que subliña a interdependencia entre a saúde humana, animal e ambiental. A programación completa da G-Night 2026 na Coruña, con charlas e outras actividades, está dispoñible no programa oficial.
