O ensaio clínico Combogal, dirixido a avaliar a mellor estratexia de vacinación fronte á gripe e á COVID nas persoas de 65 ou máis anos, iniciará a súa andaina este sábado 17 de outubro nos 14 hospitais públicos da comunidade. Nos últimos días, enviáronse mensaxes SMS con información sobre esta iniciativa a unha poboación seleccionada duns 730.000 persoas.
O estudo desenvolverase no marco da campaña ordinaria de vacinación. A propia citación para acudir ao centro de saúde informará tamén da posibilidade de desprazarse ao hospital para participar no estudo. O obxectivo principal é comprobar se unha vacina combinada fronte á gripe e á COVID reduce o risco de hospitalización, complicacións e morte, en comparación coa administración simultánea dunha vacina antigripal de alta dose e outra fronte á COVID en inxeccións separadas.
A vacina combinada xa foi testada e autorizada, polo que este estudo busca determinar a estratexia de protección máis axeitada para a poboación maior. As persoas interesadas en participar poderán reservar cita a través da aplicación Sergas Móbil ou no teléfono 900 842 217, operativo de 10,00 a 20,00 horas. Haberá ocos dispoñibles durante cinco fins de semana consecutivas.
O ensaio desenvolverase nas sete áreas sanitarias, nos hospitais das sete cidades e nos hospitais comarcais. Os centros de vacinación inclúen o Complexo Hospitalario Universitario da Coruña (Chuac) e o Hospital Virxe da Xunqueira na área da Coruña e Cee; o Complexo Hospitalario Universitario de Ferrol (CHUF); o Complexo Hospitalario Universitario de Santiago (CHUS) e o Hospital da Barbanza; o Hospital Universitario Lucus Augusti (HULA), o Hospital da Mariña e o Hospital de Monforte; o Complexo Hospitalario Universitario de Ourense (CHUO), o Hospital Santa María Nai, o Hospital de Verín e o Hospital de Valdeorras; o Complexo Hospitalario Universitario de Pontevedra (CHOP) e o Hospital do Salnés; e o Complexo Hospitalario Universitario de Vigo (Chuvi).
A campaña de vacinación fronte á gripe e a COVID comezou o pasado 28 de setembro nas residencias de maiores. O pasado martes 13 iniciouse tamén a vacinación dos profesionais sanitarios e a infantil. O vindeiro luns, 19 de outubro, estenderase ás persoas de 70 ou máis anos, e o 2 de novembro continuará coas embarazadas, seguido das persoas de 60 ou máis anos a partir do 9 de novembro.
