O Palacio de Congresos e Exposicións de Santiago de Compostela foi o escenario elixido pola compañía galega de distribución alimentaria Vegalsa-Eroski para celebrar o seu undécimo encontro coa industria do sector. O evento congregou a 400 representantes de empresas, denominacións de orixe, cooperativas agrarias, entidades e institucións, co obxectivo de presentar os resultados da compañía e reflexionar sobre o presente e o futuro do ámbito agroalimentario.
Baixo o título “Un mundo con IA: a transformación das empresas alimentarias”, a xornada contou con cinco relatorios e intervencións institucionais de figuras relevantes como o presidente da Xunta de Galicia, Alfonso Rueda; a conselleira de Medio Rural, María José Gómez; e o presidente da Deputación da Coruña, Valentín González.
O director xeral de Vegalsa-Eroski, José Manuel Ferreño, destacou a importancia da colaboración cos provedores para o crecemento conxunto. "A distribución e o sector produtivo necesitamos ir da man para adaptarnos en menor tempo posible ás necesidades dun consumidor para o que o prezo, a sustentabilidade e as novas tendencias son cada vez máis importantes", sinalou.
Pola súa banda, o director de Compras, Jorge Eiroa, subliñou o valor do sector produtivo local, que xera riqueza e achega produtos frescos de calidade. Explicou que a compañía reflicte este compromiso no punto de venda mediante sinalización que identifica a orixe local e en folletos promocionais onde a proximidade ten "unha posición destacada".
A CEO de Grupo Eroski, Rosa Carabel, tamén interveu para resaltar o reforzo de alianzas coa industria local, buscando un sector máis innovador, eficiente e sustentable. "En Grupo EROSKI cremos nun modelo que xera riqueza na contorna, impulsa pequenos produtores e sitúa ás persoas e ao ben común no centro da transformación do sector", afirmou.
A xornada tamén serviu para analizar o impacto da innovación e da intelixencia artificial (IA) na cadea de valor alimentaria. O director do Centro Singular de Investigación en Tecnoloxías Intelixentes da USC (CiTIUS), Senén Barro, profundou no potencial da IA para optimizar procesos e mellorar a competitividade empresarial.
O CEO de Vicky Foods, Rafa Juan, reivindicou a capacidade de adaptación das empresas con traxectoria ás novas demandas do mercado e dos consumidores, baixo o lema "Innovar para alimentar un mundo mellor".
O encontro enmárcase no compromiso de Vegalsa-Eroski coas comunidades onde opera. En 2025, a compañía destinou preto de 600 millóns de euros a compras de proximidade, colaborando con 885 provedores locais de Galicia, Asturias e Castela e León, que representan o 48% do total de socios.
